Caritas Gipuzkoa Jerusalemgo Caritasek egindako deiaren erantzunari gehitu nahi da, Gazako Zerrendara laguntza humanitarioa eramateko. Laguntza-eskaera joan den urtarrilaren 4an aktibatu zen Caritas Internationalisen bitartez, eremu horretako herritarrei laguntzeko, bai eta Zisjordaniako familiei ere, azken horien egoera ekonomikoa eta soziala larriagotu egin baita gatazkaren ondorioz.

Horretarako, Espainiako Caritasek 250.000 euroko lehenengo bidalketa bat egingo du. Helburua da, batetik, lehen mailako zerbitzu medikoa ematea, eta, bestetik, laguntza ekonomikoa eskaintzea, eskudirua emanez Gazako Zerrendan harrapatuta dauden familiei. Horrez gain, “Caritas, Lur Santuarekin” larrialdi-kanpaina hasi du, emaileen solidaritatea bideratzeko.

Jerusalemgo Caritasek, orain, Espainiako Caritasen babesa eskatu du, bere taldeak seguruago daudelako momentu honetan, operazioen logistika hobeto finkatuta dagoelako eta, ondorioz, gaitasun handiagoa dutelako eskala handiagoan laguntzeko.

Larrialdi-dei handia

Jerusalemgo Caritasek eskatutako eta Caritas Internationalisek aktibatutako larrialdi-deiaren aurrekontua 2,95 milioi eurokoa da. Burutzeko epea urtebetekoa izango da, eta, kalkuluen arabera, gutxi gorabehera 23.275 zuzeneko onuradun eta 35.720 zeharkako onuradun izango ditu.

“Gazako taldeek lehen mailako osasun-arreta, laguntza psikosoziala eta osasun mentalaren arloko arreta emango dituzte, eta familia zaurgarrienei eskudirua ematearen zeregina koordinatuko dute, familia horiek oinarrizko beharrak asetu ahal izateko. Era berean, Caritasek Gaza hirian duen osasun-zentroa birgaitzeko lanak egingo dira, gaur egun oso kaltetua baitago bonbardaketen ondorioz, eta ahalik eta lasterren jarriko da martxan. Zisjordanian, eskudiru-transferentzia gisa emango da;laguntza, familia zaurgarrienek aukera izan dezaten elikaduraren edo alokairuaren gastuei aurre egiteko, edo oinarrizko beste gauza batzuk erosteko”, azaldu du Espainako Caritaseko Pablo Reyerok.

Caritas Internationalisen azken egoera-txostenaren arabera, egunez egun gora egiten ari dira zibilen heriotzak, eta elikagaiak, edateko ura eta tratamendu medikoa eskuratzeko ezintasunak are arrisku-egoera larriagoan jartzen ditu herritar zibilak. Gainera, herritarren %85 etxetik kanporatu dute, etxebizitzen %60 baino gehiago suntsituta edo kaltetuta geratu da, eta itxi egin behar izan dituzte eskolak.

“Kontziente gara, zoritxarrez, krisi humanitarioa ez dela desagertuko epe laburrean; beraz, laguntza ematen jarraituko dugu ahal dugun artean, Konfederazioak esaten digun neurrian eta Jerusalemgo Caritasek eskatzen digun bitartean”, dio Reyerok.

Bazterketaren areagotzea Zisjordanian.

Krisiak, halaber, inpaktu handia du Zisjordaniako biztanleengan, neurri handi batean turismotik eta erromesaldietatik bizi baitira. Oroigarri-dendek, hotelek, turismo-gidariek eta ostalaritzaren sektorean lan egiten duten guztiek hiru hilabete baino gehiago daramatzate diru-sarrerarik gabe. Hiri batzuetan, biztanleen %70 baino gehiagok sektore horretatik ateratzen du bizibidea, eta milaka langile kaleratu dituzte.

Horrez gain, Israelen lan egiten zuten Zisjordaniako soldatapekoek eta langileek orain ezin dituzte kontrol-postuak zeharkatu, eta, beraz, lanerako baimenak galdu dituzte, eta murriztu egin dira beren diru-iturriak. Jerusalemgo Caritasen kalkuluen arabera, 170.000 pertsona inguru daude egoera horretan. Errealitate horrek krisi ekonomiko larria eta kezkagarria eragin du.

Su-etenerako deia

Dagoeneko 100 egun baino gehiago irauten ari den gatazka honetan bizitako sufrimendu ikaragarriaren aurrean, Caritasek su-etena eskatzen du berriro ere, eta bat egiten du Frantzisko aita santuak eta Caritas Internationalisek etengabe egiten duten bakerako deiarekin.

Espainiako Caritas Jerusalemgo Caritasen kolaboratzailea da duela hogei urte baino gehiagotik. Baterako lan horren helburua da Lur Santuko sufrimendua arintzea eta zaurgarritasun-egoeran dauden pertsonen beharrei erantzutea. Senideen arteko lankidetza-jarduerak Caritasen nazioarteko konfederazioaren markoaren baitan gauzatzen dira. Lankidetza horren bitartez, zenbait arlotako programak garatu dira, hala nola osasun-arreta, laguntza psikosoziala, elikadura-segurtasuna eta bizitzeko baliabideak sustatzea.

Caritas Gipuzkoak bat egin du Caritas Jerusalenen larrialdi-deialdiarekin, Gazako Zerrendara laguntza humanitarioa eramateko eta eremu horretako biztanleei laguntzeko. Halaber, gatazkaren ondorioz euren egoera ekonomiko eta soziala okertu zaien Zisjordaniako familiei laguntzeko ekimenarekin.

Helburua Gazako Zerrendan harrapatuta dauden familiei oinarrizko osasun-laguntza, laguntza psikosoziala eta laguntza ekonomikoa ematea da. Caritas Internationalis-ek jakinarazi duenez, zibilen heriotzak egunero gora egiten jarraitzen du Gazan, eta elikagai, edateko ur eta arta medikorako sarbide faltak egoera are larriagoa bihurtzen du. Gainera, biztanleriaren %85a bere etxeetatik kanporatua izan da, eta etxebizitzen %60a baino gehiago suntsituta edo kaltetuta dago. Eskolak ere itxi egin behar izan dituzte.

Krisiak Zisjordanian ere eragin handia du, non biztanleriaren %70ak turismo-sektorean lan egiten duen. Gainera, Israelen lan egiten zuten pertsonek ezin dituzte kontrolguneak zeharkatu, lan-baimenak galdu dtuzte, eta, horren ondorioz, diru-sarrerak galdu. Caritas Jerusalenen kalkuluen arabera, 170.000 pertsona inguru egoera honetan daude.