Caritas Internationalisek egindako deiarekin bat eginez, Caritas Gipuzkoak irmoki gaitzesten ditu Estatu Batuek eta Israelek Iranen aurka egindako erasoak —1.200 bonba baino gehiago jaurti dituztela adierazi baitute—, bai eta Iranek Israelen eta eskualdeko beste herrialde batzuen aurka egindako errepresalia-erasoak ere, hala nola Bahrainen, Iraken, Jordanian, Kuwaiten, Qatarren eta Arabiar Emirerri Batuetan.

Gerra-ekintza horiek eskualdeko tentsioa, indarkeria eta ezegonkortasuna areagotzen dituzte, bakearen aukerak arriskuan jarriz. Horrez gain, giza duintasunaren, zuzenbide estatuaren eta nazioarteko zuzenbidearen urraketa larriak dira; besteak beste Nazio Batuen Gutuna eta nazioarteko zuzenbide humanitarioa barne, biztanleria zibila eta borrokalari ez diren pertsonak gatazka egoeretan babesten dituena.

Eskolak, ospitaleak, gurtzarako lekuak eta biztanleria zibila bizi den eremuak —ikasteko, zaintzarako eta segurtasunerako santutegi izan beharko luketenak— nazioarteko zuzenbide humanitarioak babestutako espazioak dira. Horregatik, helburu horien aurkako erasoak, nahita egindakoak zein bereizketarik gabe egindakoak izan, moralki salagarriak dira eta legeak debekatzen ditu.

Eskualdeko tentsioa azkar areagotzen ari den une honetan, Caritasek alderdi guztiei berehala atzerapauso egitea exijitzen die. Egoera baretzea eta ekintza militar berririk ez abiatzea beharrezkoa da, biztanleria zibila babesteko betebeharra betetzeko salbuespenik gabe.

Ekialde Hurbilean indarkeriaren areagotzeari erantzunez, Leon XIV. aita santuak egonkortasunaren eta bakearen aldeko dei sendoa egin du. Haren hitzetan, bakea elkarrizketa arrazoizko eta zintzoaren bidez bakarrik lor daitekeena. Tartean dauden alderdi guztiei zuzendu zaie:

«Neurriz kanpoko hondamendi baten arriskua ikusita, dei sutsua egiten diet inplikatutako alderdiei indarkeriaren espirala gelditzeko ardura morala har dezaten, konponbiderik gabeko ezbeharra bihurtu aurretik. Diplomaziak bere eginkizuna berreskura dezala eta herrien ongia sustatu dadila; azken hauek justizian oinarritutako elkarbizitza baketsua desiratzen baitute. Eta jarrai dezagun bakearen alde otoitzean».

Caritasek premiazko dei horrekin bat egiten du. Une kritiko honetan, justiziak, neurritasunak eta giza bizitzaren nagusitasunak nazioetako buruzagien erabaki guztiak gidatu behar dituzte. Nazioarteko komunitateak azkar jokatu behar du errugabeen bizitza gehiago gal ez dadin, erantzukizunak eskatzeko, babesa bermatzeko eta bakerako benetako bidea irekitzeko.