Boluntariotza Caritas Gipuzkoaren funtsezko zutabeetako bat da. Ez soilik inplikatutako pertsona kopuruagatik, baizik eta eguneroko keinu bakoitzean elkartasuna eta hurkoarenganako maitasuna gorpuzten duten moduagatik.
Bere lan konprometitu eta iraunkorra Elizaren presentzia da munduan. Boluntarioek Caritasen jarduera osoan parte hartzen dute, konpromiso sozialaren izaera integrala eta gizatiarra indartuz. Beraz, eusten eta eraldatzen duen presentzia konprometitua dira.
Boluntarioen ekintza esparruak
- Lehen harrera parrokietako Caritasetan: Arretaz entzuten, balorazio partekatua eta laguntza zuzena eskaintzen duten pertsonak.
- Hezkuntza laguntza: Haur eta familiei bidelaguntza eta eskola laguntza eskaintzen dizkiete, konfiantza eremuak sortuz.
- Etxebizitza eta gizarteratzea: Ibilbide pertsonalizatuetan bidelaguntza, eta gizarteratzearen alde egiten duten aisialdi ekintzetan.
- Komunitatean eta arlo soziolaboralean esku-hartzea: Prestakuntza tailerretan parte hartzen dute, okupazio ibilbideetan eta komunitate ekintzetan.
- Antolakuntza eta estrategian laguntza: Administrazio lanak, logistika, lan teknikoak eta harremanekoak, erakundea indartzen dutenak.
Bidelagunen bidelagun izan
Boluntarioekin dugun harremana ibilbide integral baten bidez zaintzen da: hitzaldi informatibo bat, hasierako elkarrizketa, esparru egokienera bideratzea, ‘Hasiberriak’ prestakuntza eta lantaldeetan etengabeko bidelaguntza eskainiz. Prozesu honek konpromisoaren jasangarritasuna bultzatu nahi du Caritasen misioaren barruan.
Honetarako, hainbat gune ditugu, besteak beste: mahai teknikoa, boluntariotzaren ardura duten profesionalek osatua, antolakuntzaren eta estrategiaren hobekuntzak bultzatzen dituena; erreferenteen mahaia, boluntarioek osatua eta erakundearen bizitzan boluntarioen presentzia eta parte-hartzea sustatzen duena; ZAINDU taldea, boluntario berrien zaintza eta entzute aktiboa ardatz dituena, harrera beroa eta konprometitua sustatuz.
Atzemandako inpaktuak
- Profil desberdinetako boluntario berriak hurbiltzea, Caritasen izateko eta egiteko era indartuz.
- Antolaketa sare erantzunkidea sendotzea, boluntarioen parte-hartzea bultzatzeko.
- Boluntarioak eraldaketa sozialaren eragile giltzarritzat aitortzea.
