Erakundea 1966ko maiatzaren 9an sortu zen ofizialki

Caritas Gipuzkoaren 60. urteurrenaren ospakizunak ostiral honetan, maiatzaren 8an, 12:00etan hasiko dira, Donostiako Trinitate plazan (Alde Zaharra), egingo den topaketa publikoarekin (euria eginez gero, Santa María elizako eskaileretara lekualdatuko da). Bertan, zenbait testigantza entzungo ditugu eta familia-argazki handi bat aterako da. Bertara, Caritas Gipuzkoako boluntario, langile edo bidelagun izan diren pertsona guztiak daude gonbidatuta. Ekitaldia Beraun Abesbatza Herrikoiaren ahotsekin eta trikitixa musikarekin girotuko da.

Honez gain, maiatzaren 21ean Bihotzdun Enpresak lehen aitorpen ekitaldia egingo dugu, urte hauetan Caritasekin elkarlanean aritu diren Gipuzkoako enpresen konpromisoa eskertzeko. Ekitaldia María Cristina hoteleko Zubia aretoan izango da, 18:30ean. Ekitaldi honetan, Iranzu Sáinz de Murietak (Sinnple aholkularitza) “Konpromisoa duen enpresaren etorkizuna: xedea, inpaktua eta neurketa” hitzaldia eskainiko du.

Ekainaren 5ean, Gipuzkoako Medikuen Elkargoaren egoitzak (Frantzia pasealekua, Donostia) Euskadiko Gizarte-Bazterkeriari eta Garapenari buruzko azken FOESSA txostena sakon aztertzeko jardunaldi teknikoa hartuko du, profesionalei zuzendutakoa. Gizarte eta arlo akademikoko hainbat adituk hartuko dute parte, besteak beste: Sebastián Mora (soziologoa eta FOESSA Fundazioko zuzendari exekutibo ohia), Marina Sánchez-Sierra (IX. FOESSA txosteneko batzorde teknikoko kidea) eta Joseba Zalakain (SiiS-eko zuzendaria). Horrez gain, ongizate-estatuaren etorkizunari eta desberdintasunen aurrean hirugarren sektorearen eginkizunari buruzko bi mahai-inguru izango dira, arduradun publiko eta hirugarren sektore sozialeko ordezkarien parte-hartzearekin.

Uda ondoren, izaera ludikoagoa duten ekitaldiak egingo ditugu, eta horien berri aurrerago emango da.

JATORRIA

Caritas Gipuzkoa 1966an sortu zen ofizialki irabazi-asmorik gabeko elkarte gisa eta Eliza katolikoaren ekintza soziokaritatibo eta sozialeko erakunde gisa, Vatikano II. Kontzilioaren ondoren. Bere misioa Gaudium et Spes konstituzio pastoralean oinarritzen da; honek, Eliza pertsonen alboan kokatzen du, bereziki pobrezia edo sufrimenduan bizi direnen ondoan, giza duintasuna eta ongizate komuna sustatuz.

Hala ere, 50eko hamarkadaren erdialdetik, Gipuzkoako parrokia askok gerraosteko beharrei erantzuten zieten jada, besteak beste, Estatu Batuetako Gizarte-laguntza bideratuz.

EZER BAINO LEHEN, ESKERRIK ASKO

Caritas Gipuzkoaren 60 urteak ospatzea, batez ere, eskertzeko unea da. Partekatutako bide baten memoria egitea da; bide horretan, milaka boluntariok, bazkidek, emailek eta profesionalek, beren konpromiso eskuzabalari, doakotasunari eta gizatasun sakonari esker, zaurgarritasun eta gizarte-bazterketa egoeran dauden pertsona askoren sufrimendua, ahultasuna eta itxaropena bidelaguntzeko aukera eman dute. Eguneroko emate hori izan da, eta izaten jarraitzen du, Caritasen bihotza: entzuten, hartzen, laguntzen eta duintzen duen presentzia hurbila.

Urteurren hau, halaber, denboran zehar misio hau sostengatu duten kristau komunitateei egindako aitortza da. Maitasunaren eta fedearen bizipenetik abiatuta, pertsona bakoitzaren duintasuna erdigunean jartzea bilatzen duena ekintza bultzatu dutelako, ez bakarrik behar materialei erantzun. Caritas Ebanjeliotik sortu eta eraikitzen da, justiziarekin, elkartasunarekin eta gehien behar dutenen zaintzarekin konprometitutako Eliza baten adierazpen gisa. Maitasuna —Caritas— pertsonak ausardiaz eta eskuzabaltasunez justizian eta bakean konprometitzera bultzatzen dituen indarra da (CIV 1).

Hortik sortzen da urteurren honetarako aukeratutako lema: Caritas Gipuzkoa, 60 urte jasotakoa ekintza bihurtuz. Izan ere, denbora honetan, ahalegin eta eskuzabaltasun hori guztia biltzea izan dugu helburu, itxaropen eta etorkizun partekatua ereiteko, gizarteko pertsona behartsuenei beren bizi-proiektua eraiki ahal izan dezaten.

Sei hamarkada hauetan, Caritas Gipuzkoak gizarte-aldaketetara eta bazterketa-egoera berrietara egokitzen jakin du: pobrezia agerikoenei emandako lehen erantzunetatik, gaur egungo erronketara: gizartearen aniztasuna, migrazioa, bakardadea, prekarietatea edo desberdintasunak, besteak beste. Osasun, ekonomia eta gizarte-krisiei aurre egin die, betiere bere misioari leial jarraituz: pertsona zaurgarrienen ondoan egotea.

Zailtasunek ez dute Caritasen konpromisoa ahuldu; aitzitik, bere nortasuna indartu egin dute: beharrei erantzuteaz gain, injustiziaren arrazoiak salatzen dituen eta horiek eraldatzeko lan egiten duen elkartasun-sarea izatea. Etorkizunari begiratzea itxaropen hori eta konpromiso hori berritzea da: komunitatea eraikitzen jarraitzea, aliantzak ehuntzea eta gizarte bidezkoago, inklusiboago eta anaiartekoago bat sustatzea, jakinda “ongizate komuna nahi izatea eta horren alde lan egitea justiziaren eskaera dela” (CIV 7).

Hau guztiagatik, Caritas Gipuzkoak eskerrak eman nahi dizkie bide honetan parte hartu duten pertsona guztiei —boluntarioei, profesionalei, parrokia-komunitateei, emaileei eta hainbeste esku anonimoei—. Eta bereziki gogoratu nahi ditu 60 urte hauetan bidelagun izan dituen pertsona guztiak. Haien bizitzek, zailtasunek eta istorioek zentzua eman diote gure misioari, eta bizirik mantentzen dute haren izateko arrazoia.