Lagun maiteok,
IBILIAN —“Orainaldi berria ehuntzen”— jardunaldi biziaren ondoren; zuen parte-hartzeagatik, entzuteagatik eta ekarpenengatik eskerrak eman nahi dizkizuegu. Energiaz, hausnarketaz eta konpromisoz beteriko topaketa izan zen, elkarri komunitate gisa begiratzeko eta egiten dugunaren eta garenaren zentzua berresten lagundu ziguna.
Jardunaldi hura ez zen amaiera bat izan, baizik eta Gizarte Ekintzaren Ereduaren (MAS) eguneratze-prozesuaren abiapuntua. 2025-2026 ikasturte osoan zehar egingo dugun bidea izango da, gure identitatea, gure laguntzeko modua eta gizarteari buruzko gure begirada indartzen jarraitzeko.
Lehen blokea: Errealitatea, abiapuntu
Hemendik eta abendura arte, MASaren lehen zutabea landuko dugu: ERREALITATEA.
Gaur egungo mundua arretaz begiratzeko denbora nahikoa hartu nahi dugu —bere hutsuneak eta argiak—, guregan eragina duten gizarte, ekonomia eta kultura aldaketak ezagutzeko, eta horiek guztiak gure laguntzeko moduan zer ondorio duten galdetzeko.
Hiruhileko honetan, zuen taldeetan, zonaldeetan edo zerbitzuetan elkartzeko, hausnarketa egiteko eta elkarrizketa partekatzeko gonbidapena luzatzen dizuegu.
Lana errazteko, datozen egunetan ‘Gizarte Ekintzaren Eredutik bidelagun izatea’ izeneko koadernoa jasoko duzue etxean, denok gida berdina izan dezagun. Bertan, proposamenak, galderak, testuak eta dinamikak aurkituko dituzue; esperientziak partekatu eta eguneroko jardunean bizi duguna hitzetan jartzeko lagungarri..
- Zuen ekarpenak nola jaso
Ekarpenak modu erraz eta ordenatuan jaso ahal izateko, hiru galdera nagusi dituen galdetegi digitala prestatu dugu:
- Begirada: Zein gizarte-aldaketa edo tentsio ikusten dituzue zuen inguruan eta laguntzen dituzuen pertsonengan?
- Hausnarketa: Zer dio errealitate honek Caritasi buruz? Zer birpentsatu edo aldatu beharko genuke?
- Proposamena: Zein urrats zehatz eman genitzake errealitate honi hobeto erantzuteko?
Galdera hauek taldean edo lantaldean erantzutea gomendatzen dizuegu, aurretik eztabaida labur bat egin ondoren.
Formularioa honako estekan dago eskuragarri:
Formularioa betetzeko epea 2025eko abenduaren 30a arte izango da, jasotako ekarpen guztiak sintesi bateratu batean bildu ahal izateko.
Prozesu partekatua
Ikasturtean zehar, MASaren lau zutabeetan aurrera egingo dugu, hiruhilekoz hiruhileko:
- Errealitatea, abiapuntu (2025eko urria–abendua)
- Pertsona, erdigunean (2026ko urtarrila–otsaila)
- Maitasuna eta errukia, eragile gisa ;
- Komunitatea, ikur (2026ko maiatza–ekaina)
Bloke bakoitza ikasteko, partekatzeko eta gure ekintza boluntarioaren zentzua berritzeko aukera izango da. Bildutako ekarpen eta hausnarketa guztiak baliagarriak izango dira Caritas Gipuzkoaren Gizarte Ekintzaren Ereduaren dokumentu berria elkarrekin eraikitzeko.
Eskerrik asko prozesu honen parte izateagatik. Eskerrik asko zuen begirada konprometituagatik, zuen hitzengatik eta itxaropena mantentzeagatik.
Elkarrekin egingo dugu bidean.
