Ekainaren 16tik 19ra, Taupagunea elkargune, bizikidetza eta hausnarketa tokia bihurtu zen Irungo Zabaltza plazan. Caritas Gipuzkoak antolatuta, elkarteko zentro eta programetako boluntario, parte-hartzaile eta langile asko atera zituen kalera, eta horrekin batera, jardueretan eta giroan parte hartu nahi izan zuten beste hainbeste lagun hurbildu ziren.
Hiritarren artean topagunea izatea helburu
Hori baita, hain zuzen, Taupagunearen helburua: gure zentro eta programetan egunero laguntzen ditugun errealitateak kalera hurbiltzeko gunea izatea. Hortaz, bertan izan zire Hotzaldi, Trintxer-Emeki, Aterpe edo Sorabilla bezalako zentroak, gizarte eta/edo etxebizitza bazterketa egoeran dauden pertsonengandik hurbil daudenak; Bidelagun, Bultzada, Miriam, Lamorus tailerra, Altza-Baratza edo Bihotzdun Enpresak, enplegua edo eskolako laguntza bezalako eremuetatik pertsonak eta familiak laguntzen dituzten programak; eta Nazioarteko Lankidetza arloa, Caritas Gipuzkoak laguntzen dituen proiektuak ezagutzera eman zituena.
Hausnarketa eta konpromisoa piztu zuten mahai-inguruak
Egin genituen bi mahai-inguruak Taupaguneko une nabarmenetakoak izan ziren, benetan aberasgarriak izan zirenak.Lehenengoan, «Harrera ehuntzen: migratutako pertsonen loturak eta eskubideak», migratutako pertsonek gure ingurura iristean dituzten zailtasun nagusiei buruz lehenengo pertsonan entzuteko aukera izan genuen; batez ere babes-sistematik kanpo uzten dituzten oztopo administratiboak direla eta, hala nola erroldatzeko zailtasunak. Manko Senegal, Adiskidetuak, Bizi Irun eta Harrera Sarea bezalako elkarteek parte hartu zuten, egunero gizarte abegikor baten alde lan egiten dutenek. Bestalde, Ikuspegi behatokiak gure kohesio soziala zaintzearen garrantzia azpimarratu zuen.
Bigarren mahai-inguruak, «Etxebizitza eskubide gisa: sarbidea bermatu, babesa ziurtatu, bazterketa ekiditu», administrazio publikoen (Eusko Jaurlaritza eta Irungo Udala) eta egunero etxebizitzaren errealitatea laguntzen duten elkarteen (Stop Kaleratzeak, Erletxea) ikuspegiak elkarrekin kontrastatzeko aukera eskaini zuen. Azken horiek ausardia eta espekulazioa saihestuko duen arautzea eskatu zuten. SiiS-ek, berriz, gaur egungo egoerara nola iritsi garenen inguruko analisia eskaini zigun.
Arraun-erronka solidarioa, edizio honetako berritasun arrakastatsua
Edizio honetako berrikuntzetako bat Salto Foundationek babestutako arraun-erronka solidarioa izan da, Hondarribiko Arraun Elkarteko eta Irungo Santiagotarrak kluben laguntza izan zuena. Bero handia egin arren, jende asko hurbildu zen gizarte bidezkoago baten alde arraunean aritzera. Erronka gainditu zen, eta beste helburu batzuk lortzeko bide onetik goazela erakutsi zigun.
Musika, dantza eta giro ona nagusi izan dira aste osoan
Parte-hartze zabalak edizio honen ezaugarri nagusietakoa izan da. Aste osoan zehar, hainbat une musikal izan ziren —Atzokoak, Klink, Oiasso Txaranga, Sin Fronteras, Betiko Ametsa abesbatzak eta Irungo Kontserbatorioko ikasleen kontzertua—, Lagun-Artea dantza taldearen erakustaldiak eta Maria Arandia magoaren ikuskizuna. Giro ona etengabea izan zen: haurrek, familiek eta boluntarioek elkarrekin gozatu zuten proposamenekin, hurbiltasun eta goxotasun giroa sortuz.
Gure eskerrik beroenak aurrera ateratzea posible egin zenuten guztioi
Gure eskerrik beroenak eman nahi dizkiegu edizio hau posible egin duzuen boluntario eta langile guztiei, Taupagunea musikaz eta edukiz bete dutenei eta bidean geldialdia egin eta gurekin partekatu duten pertsona guztiei.
Eskerrik asko, Irun!
Taupagunea nolakoa izan den ikusi nahi baduzu, hemen duzu bideo-laburpen bat:
